Poetry in Creole - Puezia na Kriolu

Cabo Verde

Di brasu abertu n perta-bu riju
n da-bu nha amor, ma nha kalor
n ben traze-bu un roza branku
sinal di afetu y di pureza.
Si otu, amor ben konfesa-bu
ka bu dixa-l ingana-bu, pamo se 
sentimentu e ka mas forti ki di me.

Nin se ku agrabu, da-n
un apertu, ka bu dixa-n
sinti frosteru. Ben da-n un beju, 
da-n un abrasu di tudu bu korasan.
O Cabo Verde ami n ka nega
bu txon kastanhu d'oru bistidu
bu Ceu azul, bu mar bu luar
na otu mundu ka ten igual.

N ben traze-bu un roza branku
sinal di un amor ternu y sinseru
se ramu verdi di speransa
ka ta dixa-n perde kunfiansa
nes bu amor meigu y fiel.

Nin se ku agrabu, da-un apertu, 
ka bu dixa-n sinti frosteru
ben da-n un beju, da-n un abrasu
di tudu bu korasan.
O Cabo Verde ami n ka nega
bu txon kastanhu d'oru bistidu
bu Ceu azul, bu mar bu luar
na otu mundu ka ten igual.

Sol di Djarfogo

Sol kenti, sol di Djarfogo
ben traze-n rekadu, mantenha
di kes ki na bai n dixa
sen sosegu nen speransa.

Ben fra-n kuze es fra, kuza
es manda-n, si inda es
e di me, si inda es kren txeu
o si nha amor es bota djuntu
kel lensu branku es perde-l na 
mon di bentu es dixa-n na dia 
di nha partida.

Sol kenti, sol di Djarfogo
traze-n notisia di Bila na
kada borta ki bu da spia-n
nha genti, da-s aligria, fra-s
monti mantenha n manda-s, ninhun
rasposta es ka dan.
es nega-n nha morna di lonji, es 
fra-n e ka di Beleza.

Sol fra-s nha versu ka di Cardoso
nen di Nho Roqui e nha storia.
Nha versu e di fidju terra squesedu
na sombra di distinu.